Tolosa

Tolosa Gipuzkoako hiribildua da, 1256an Gaztelaren eta Nafarroako Erresumaren arteko mugako gotorleku gisa sortua. Mende luzez lurraldeko hiriburua izan zen, eta Nafarroaren eta Kantauri itsasoko portuen arteko merkataritza-bidean funtsezko gunea. Iragan horren ondorioz, nortasun handiko hirigune historikoa gorde du, gotikotik neoklasikora bitarteko estiloak biltzen dituzten eraikin eta monumentuekin.

Tolosako kultura-bizitzak presentzia nabarmena du lurraldean. Bertan dago TOPIC, Txotxongiloaren Nazioarteko Zentroa, erakusketa iraunkorrak, antzerki-jarduerak eta Europan erreferentzia den dokumentazio-zentroa biltzen dituena. Gipuzkoako zaharrenetakoak diren inauteriak eta San Joan jaiak, Bordondantza elementu bereizgarri dutela, herriko jai-egutegi errotuaren parte dira.

Gastronomia ere hiribilduaren ardatz nagusietako bat da. Larunbatetako azokak eskualdeko tokiko produktuak biltzen ditu, eta Tolosako sukaldaritzaren erreferente ezagunen artean daude babarrun beltzak, idi-txuletak eta gozoki tradizionalak.