Mundaka

Mundaka Bizkaiko kostaldeko arrantzale-herria da, Urdaibaiko itsasadarraren bokalean kokatua, Urdaibaiko Biosfera Erreserbaren barruan. Itsasadarraren sarreran duen kokapenak, Laidako hondartzaren parean, bere paisaia eta nortasuna baldintzatzen ditu.

Portua da herriko gune nagusia. Haren inguruan biltzen da hirigune historikoa, kale estu eta bihurriekin, eta interes handiko eraikinekin; besteak beste, Errenazimentuko Andre Maria eliza, Larrinaga jauregia eta udal liburutegi zaharra, garai batean Done Jakue Bideko ospitalea izan zena. Herrigunetik zertxobait aldenduta dagoen Santa Katalina ermitak Urdaibaiko itsasadarraren bokalearen eta ingurune naturalaren ikuspegi aparta eskaintzen du. Atalaia eta Portuondo begiratokiek osatzen dituzte kostaldeko paisaia behatzeko gune nagusiak.

Mundaka mundu mailako erreferentzia ere bada surfaren alorrean. Itsasadarraren bokalean sortzen den ezker olatua Europako luzeenetako eta erregularrenetako bat da, eta nazioarteko maila goreneko txapelketak hartu izan ditu. Horrez gain, Mundakako Aratusteak Euskadiko inauteri ospetsuenetakoak dira; Atorrak eta Lamiak hirigune historikoko kaleetan barrena ibiltzen dira, jaiari nortasun berezia emanez.